خطط مسبقا كل شئ فى حياتك
من أكتر الحاجات اللى هتوفر عليك وقت هو أنك تخطط كل حاجة فى حياتك زى مثلا:
-كل يوم جمعة، خططى أكل الأسبوع و الحاجات اللى هتحتاجى تشتريها وأشترى الحاجة كلها مرة واحدة.
-كل يوم بليل اعمل to do list لليوم اللى بعده فيها الحاجات اللى هتعملها أو اللى هتشتريها و المكالمات اللى هتعملها و اى حاجة ليها علاقة بشغلك.
-خلى يوم واحد فى الأسبوع تعمل فيها مشاويرك و مشترواتك و خلى المشاوير القريبة من بعضها كلها فى يوم واحد.
قسم يومك لفترات
-قسم يومك لفترات من 30 دقيقة أو ساعة و قسم الحاجات اللى وراك على عدد ساعات يومك و خلى عينك دايما على الساعة عشان تقدر تنجز.
-وأنت بتخطط يومك خلى فى بالك كل العناصر عشان تستفيد بالوقت صح، يعنى خلى فى وقت للنوم، وقت للشغل أو المذاكرة، وقت للرياضة، وقت للقراية، وقت للأصحاب و الأهل، وقت للراحة، وقت للعناية الشخصية، وقت للهوايات، وقت للتليفزيون، و وقت لأى حاجة تانية عايز تعملها.
نظم مكتبك، دولابك، و بيتك
لو دولابك مش منظم هتاخد وقت أكتر عشان تلاقى حاجة معينة من لبسك بتدور عليها و كذلك مكتبك و بيتك. خلى فى يوم فى الأسبوع ترتب فيه كل حاجة وتتخلص من الحاجات اللى مش عايزها و ده هيوفرلك وقت باقى الأسبوع و كمان هيشجعك أنك تخلص كل اللى وراك.
فوض شخص أخر لبعض المهام
لو وراك حاجات كتير ممكن تفوض حد يساعدك فى بعض المهام خاصا فى الشغل، و بكدة هتوفر وقت و تنجز فى ال tasks اللى المفروض تخلصها.
خليك واقعى
خليك واقعى فى تقسيم المهام اللى وراك، يعنى مثلا متكتبش فى الto do list مشاوير كتير و شغل و كذا حاجة تانية لأن ده هيسببلك إحباط لما متخلصش كل حاجة و هيعطلك عن إنجاز الحاجات المهمة.
انجز الحاجات المهمة الأول
دايما حاول تخلص الحاجة المهمة و المستعجلة الأول عشان يكون عندك وقت طويل تخلصها و من ناحية تانية لما تنجزها بدرى هيكون عندك باقى اليوم تعمل أى حاجة تانية بتحبها أو أى حاجة وراك براحتك.
استخدم وقتك بذكاء
-خليك ذكى فى إستخدام وقتك و فرق بين أنك تكون مشغول فى إنجاز المهام و بين أنك تكون منتج بمعنى أنك ممكن تقضى يوم كامل فى حاجة واحدة فى حين أنك ممكن تخلصها بسرعة لو فكرت فى الطريقة الأصح اللى تشتغل بيها.
-لو بتعملى حاجة بأيدك مفيهاش تفكير زى شغل البيت مثلا ممكن تخلصى المكلمات اللى عايزة تعمليها و أنتى بتشتغلى.
حدد وقت معين للSocial Media
-الsocial media و smart phones بيضيعوا مننا ساعات كل يوم و بيسرقوا الوقت اللى ممكن الإستفاده بيه فى إنجاز حاجة مهمة أو لعمل حاجة مفيدة. خصص أوقات معينة فى اليوم عشان تشوف ال facebook أو twitter أو الموبيل عمتا، و شوف مقال “إزاى تتخلص من إدمان ال Social Media فى 3 خطوات؟” لأفكار أكتر.
-اقفل الموبيل و أنت بتشتغل أو بتذاكر عشان تقدر تنجز و تخلص فى وقت اقصر.
استغل أوقات الإنتظار صح
لو عارف أنك رايح مشوار معين و هتنتظر فيه، خد معاك كتاب تقراه أو خلص المكلمات اللى وراك. هتلاقى أفكار أكتر لحاجات تعملها فى مقال “15 حاجة ممكن تعملها فى أوقات الانتظار”.
استمتع بوقتك!
تنظيم الوقت هيخليك تعرف تستمتع بوقتك أكتر و هتلاقى وقت عشان تعمل حاجات بتحبها حتى لو ساعة فى اليوم.
و فى النهاية متنساش تحط هواياتك و الحاجات اللى بتخليك سعيد فى جدولك اليومى :)